كيف تنجح في العمل الحر كفريلانسر ؟

لكل فريلانسر نفسه يوصل للعملاء ويلاقي شغل ويبقى ناجح ومشهور ..
كل الفكرة إنك هتبدأ مرحلة جديدة في حياتك، وهتبدأ تتعامل مع مدير أخلاقه عالية جدًا، لما يشوفك بتجتهد وبتتقن شغلك وتديله حقه، هيديك أضعاف مرتبك وأجرك من غير ما تطلب !
أكيد بتقول في نفسك : هو فيه مدير كدة ؟ 
أيوة فيه :) وأحسن من كل توقعاتك كمان ..
المدير اللي بكلمك عنه مش بس هيديك مرتب أكبر ويعاملك كويس، لأ ..
كمان يقدر يخلي العملاء تختارك وتفضل التعامل معاك انت بالذات، ومش أي عملاء، ناس محترمة، تقدرك ولا تظلمك ..
يقدر يغرس محبتك في القلوب، ويسهلك أمورك وحياتك بطريقة لا تتوقعها ..
أكيد عرفته :)

هو من (  يُدَبِّرُ الْأَمْرَ )
هو ( الرَّزَّاقُ ذُو الْقُوَّةِ الْمَتِينُ )
هو {  الله  } تعالى ..
ولله المثل الأعلى ..

هنبدأ نتاجر مع ربنا، انطلاقًا من قول الله تعالى :
{ مَنْ ذَا الَّذِي يُقْرِضُ اللَّهَ قَرْضًا حَسَنًا فَيُضَاعِفَهُ لَهُ أَضْعَافًا كَثِيرَةً }

كل اللي هنعمله إننا من قيمة أي شغل نكسبه نطلع منه نسبة محددة تصدقًا لوجه الله، وكل واحد حسب ظروفه، مش هنلزم حد بنسبة معينة.

كمان كل فريلانسر يحاول قدر استطاعته ووقته ينشر حاجة مفيدة في مجال تخصصه، سواء معلومة، أو إعلان وظيفة، أو درس، أو نصيحة، أو تجربة حصلت معاه في شغله واستفاد منها.
بحيث المنشورات دي تبقى كمان صدقة، يبقى لنا أجرها في الدنيا والآخرة.
وتأكدوا إن ده هيفرق معاكم كتير جدًا ..

بسم الله الرحمن الرحيم
{ إِنْ تُبْدُوا الصَّدَقَاتِ فَنِعِمَّا هِيَ وَإِنْ تُخْفُوهَا وَتُؤْتُوهَا الْفُقَرَاءَ فَهُوَ خَيْرٌ لَكُمْ وَيُكَفِّرُ عَنْكُمْ مِنْ سَيِّئَاتِكُمْ وَاللَّهُ بِمَا تَعْمَلُونَ خَبِيرٌ } سورة البقرة - 271
صدق الله العظيم
----------------

بقلم: إيمان محمد
مصممة جرافيك وكاتبة مستقلة